اليوم حسيت ان لازم أرتب حياتى ,, و علشان ارتب حياتي كان لازم اتخلص من اكوام ذكرياتي
فتحت دولابى و اترددت كتير علشان أقدر أفتح درج الذكريات
خطوة اجلتها زمن طويل ,, يمكن خوف ,, يمكن كنت مش قادرة أتخيل أن أحلام الصبا بقت أكوام ذكريات لازم اتخلص منها علشان أعيش من جديد
مديت أيدي و أنا قلقانة ,, و يمكن خايفة من تداعي الذكريات عليه
كنت مقررة انى مش هأقرا أى شيء
لكن لاقيتنى استغرقت يمكن ساعتين او يمكن تلاتة مش عارفة ,, بالآخر حرقت الصور ,, رميت كل الرسائل اللي ضمت تفتح مشاعرى و أجمل أيام صبايا
سألتنى مرمر : تمت المهمة و لا لسه مترددة و خايفة ؟
قلت لها : تمت أخيراً - و تنهيدتى بتدبح قلبي
سألتنى : شوفتي كانت سهلة كتير أزاى ,, مش قلت لك ؟
قلت لها : مش فارقة معايا
قالت لي : كان مهم أوي أنك تتخلصي منهم بنفسك ,, بكرة تعرفى أنها خطوة أجلتيها كتير
علشان أعيش من جديد كان لازم حاجات كتير تترمى ,, و مش فارقة معاي
4 comments:
أن الذكريات ليست مجرد أكوام من الورق أن كل كلمة كتبتيها يوما أو سطرها قلمك ستجدينها محفورة فى داخلك ومكتوبة بحروف لن تمحى ابدا
ليتنى يا صديقتى استطيع ان امحو ذكرياتى ولكننى ادرك ذلك الواقع الدنيوى جيدا وهو ان ذكرياتنا جزء منا مهما حاولنا ستظل عالقة بنا للأبد ولكن هناك وسيلة واحدة للتعايش معها وايقاف تداعياتها وتذكرها سأضعها لك فى مدونتى اليوم باذن اللة
تحياتى
نورتى المدونة .. و فى انتظار البوست الجديد النهاردة ان شاء الله
بيسعدنى مرورك كتيرررررررر :)
فعلا
ذكرياتنا مش مجرد ورق
بس عارفة ؟
أنا مقدرش أرميها
آه بقراها كل سنة مرة مثلا
لكن ولا إيدي ولا قلبي مطاوعينني
كمان في حاجة
بجد مش فارقة معاكي ؟
تحياتي
منى
حقيقى ذكرياتنا مش مجرد ورق .. و لا نقدر نمحيها من جوانا لكن على الأقل محتاجين نتخلص من أنها تفضل موجودة قصادنا طول الوقت رغم ذكراها السيئة
احيانا علشان نقدر نبدأ و نعيش من جديد لازم نحاول نتخلص من ذكريات مؤلمة كتير
اما سؤالك مش فارقة معاى ؟؟؟؟؟؟ ممممممممم
فكرى انتى بأجابته .. يمكن أغنية فيروز أكتر تعبير عنه
:):)
دمتى بود و لك تحياتى يا قمر
Post a Comment